但唔知點解都會好想打邊爐
所以早排就約埋朋友仔一齊去食火鍋喇
朋友係長沙灣果面番工
話聽同事成日都講呢間老三
我Openrice過覺得都唔錯,所以就揀左佢
但係就好光猛同乾淨
而且d枱都唔算迫,坐得都幾舒服
唔知點解覺得張點菜紙好有台灣既感覺 (哈)
店員就已經拎左d調味料比我地混醬
雖然選擇唔多,但基本既蒜,辣椒同埋蔥都有
但黎呢到,當然係要試佢個招牌老鴨湯底啦
店家話呢個湯底係用老鴨加埋d藥材煲6個鐘而成
雖然聞落有少少羶味
但好神奇既係飲果時真係唔覺
味道幾甜,唔會好重藥味
個湯底可以當湯,亦可以用黎打邊爐,其實都幾抵
飲完湯之後,店員就會幫手添番d上湯
就可以開始打邊爐喇
手切牛有3個grade可以揀
我地揀左中間果個
正係睇牛肉既色澤都知好高質
而且脂肪既分佈好平均
食落牛味十分濃郁
加埋無冰鮮過,質感好有彈性
$218甘高質又甘大碟,真係抵食
另外叫左個豬面青
肉質嫩得黎帶少少爽口
好食過薄切果d豚肉多多聲
呢到都幾多內臟可以選擇
粉腸洗得好乾淨
而且吸哂個湯既鮮味,好食
幾款餃既味道都唔錯
不過以椰菜餃最得我心
椰菜食落爽脆,而且甜味係意想不到既重
四寶丸有牛丸,蝦丸,墨丸同鯪魚球
四款都好彈牙
不過墨丸同牛丸味道就比較淡
蝦丸就好有驚喜
因為佢無完全打到爛哂
仲會食到少少蝦肉本身既質感,
而且蝦味好強,好似真係食緊隻蝦甘
即叫新鮮即炸
就甘食其實都已經好好食
出面比較少見既鮮准山
准山煮淋左會吸左少少湯既味道
如果係出面d湯就怕會吸哂d味精味
但呢到本身個湯靚
所以食多幾條都無問題
什菜有菜心,娃娃菜,油麥菜
雖然菜好似無咩特別
但其實都食得出店家既誠意
第一,d菜洗得好乾淨
第二,d菜已經度過,所以完全無黃葉
呢2點其實真係唔會間間食肆做到
而且d菜好靚,食落又甜又淋,正
雖然位置有d遠
但當日(平日)都有唔少客人
證明呢到既質素真係好好
小公主覺得呢到既食物唔錯
而且價錢都好合理
絕對係食火鍋既好地方
不過都想建議番,店內既抽風可能要做好d
因為當間店有成20個老鴨湯係到同時滾緊
其實個味都會幾羶
所以對羶味好敏感既朋友,建議你要慎入
地址: 長沙灣順寧道15號地下4-6號舖
電話: 2360 2636