男朋友話之前同屋企人食過呢間印度野唔錯
所以就揀左佢喇。
間餐廳唔算好大
果日星期一夜晚,7點到去到都仲有位
我地無booking,安排左坐係一張近牆既2人枱
裝修方面就冇咩特別,都係一般印度餐廳格局
態度都好好,好細心,成晚都有不斷斟水
我地果晚唔係太肚餓,就叫左2樣野同薄餅
(因為5點先食完個麵 哈哈)
我就覺得個餅咸左D,不過男朋友就覺得個味OK
但我地都有D失望,因為個餅唔脆,好似出左氣咁
Murgh Tikka Makhani 茄汁咖哩雞 ($78)
(因為現場燈光好暗,D相都比較暗D)
呢個咖哩雞真係好好食
首先講下個汁,雖然係茄汁咖哩,但係都唔會無咖哩味
只係有小小辣,食唔到辣既朋友就岩哂
而且佢唔會話好重香料味 (因為有D印度餐真係會好似食緊香料咁)
到個雞喇,味道方面有小小燒雞既味
質地勁腍勁滑,真係好好味!!!
呢個焗茄子應該係將茄子烤完之後MIX落D醬到
成個醬好重芫茜味,甜甜地,會食到一絲絲茄子
一開頭點果時,無諗過係醬黎,以為係會見到原條茄子 (哈哈)
不過係醬都唔緊要啦,岩哂我地點Naan食喇。
個Naan好新鮮,即叫即烤
用黎點咖哩真係一流!!!
後來我地2個唔夠食,再追加一個Paneer Kulcha 芝士烤餅 ($25)
(不過唔記得左影相 -_-)
同Naan一樣都係即叫即烤,中間再夾住芝士
比Naan更惹味,我覺得就咁唔點汁食都好正!!
2個人食左$268,成晚除左個Papadam令人失望D之外
其他野都做得唔錯,小公主都食得好飽好滿足。
推介比食日本韓國泰國野食到悶既朋友!!!
地址: 天后清風街2號福華大廈地下
電話: 2566 8411